Nabigatze pribatua

Batzutan ederra da sekretuan ibiltzea. Ezaugarri hau martxan dagoelarik, ez duzu zure nabigazioaren arrasto txikienik ere utziko begibistan. Nabigatze pribatu modua oso erraz aktiba edo desaktiba dezakezu, berehala egiten zenbiltzanera itzuliz inoiz ezer gertatu ez balitz bezala (edo beti pribatuan nabiga dezakezu). Bereziki interesgarria da partekatutako ordenagailu batetik zure bankuko kontura sartzeko edo ziberkafe batean posta irakurtzeko.

Malwarearen aurkako babesa

Firefoxek birus, zizare, troiako zaldi eta spywareagandik babesten zaitu. Halabeharrez gune erasotzaile bat bisitatzen baduzu, gunetik ateratzeko gomendatuko dizu, zergatia azalduz.

Web iruzurraren aurkako babesa

Egin erosketak eta negozioak modu seguruan. Firefoxek faltsukerian aritzen diren guneen zerrenda eguneratzen du egunean 48 aldiz. Beraz, gune maltzur batek benetan fidatzen zaren gune baten antza hartzen duenean (zure bankua, adibidez) iruzur egiteko asmoz, nabigatzaileak mezu handi bat erakutsiko dizu.

Zaharkitutako plugin-en detekzioa

Zenbait webgunetako edukiak ikusteko "plugin" deritzoten aplikazio txikiak instalatu behar dira, bideoak erreproduzitzeko, jolasteko edo dokumentuak bistaratzeko. Plugin hauek beste konpainia batzuek garatutakoak izaten dira, eta zaila izaten dau eguneratuta dauden jakitea. Zaharkitutako plugin-ak segurtasun arrisku direlarik, Firefoxek ohartaraziko zaitu erasoak jasan ditzakeen plugin bat badaukazu, eta bertsio eguneratura bideratuko zaitu. Ikusi plugin-ak aztertzeko orria.

Gurasoen kontrola

Sendotu Vistan sartutako gurasoen kontrolaren hobespenak—gelditu nahigabeko deskargak eta gehiago.

Garbitu azkenaldiko historia

Garbitu zure datu pribatu guztiak edo azken orduetako aktibitatea klik gutxi batzuekin. Erabateko kontrola daukazu zer ezabatu erabakitzeko, eta berehala zure informazioa desagertuko da—zure konputagailuan nahiz liburutegikoan. Oso erraz.

Segurtasun ezarpen pertsonalizatuak

Firefoxek gune bati dedikatzen dion zaintza maila kontrolatu eta konfiantzazko lekuak zehaztu. Pasahitzak, cookieak, irudien karga eta gehigarrien instalazioaren hobespenak guztiz pertsonalizatu web esperientzia boteretsua lortuz.

Gehigarriak

Firefoxek konexio seguruak bilatzen ditu gehigarriak, hirugarrenek egindako programak eta Personasak instalatu edo eguneratu aurretik.

Pasahitz kudeatzailea

Nabigatze esperientziarekin guztiz integratu dugu ezaugarri hau. Guneen pasahitzak "gogoratzea" hautatu inolako pop-up nekagarririk gabe. Pasahitzak gogoratzeko oharra orriaren goiko partean integratuta ikusiko duzu hemendik aurrera.

Birusen aurkako softwarea

Firefox zure birusen aurkako softwarearekin ederki integratzen da. Fitxategi bat jaisten duzunero, zure konputagailuko antibirusak automatikoki egiaztatzen du, honela birusetatik eta beste malwarearen erasoetatik babesteko.

Pop-up blokeatzailea

Kanporatu pop-up (eta pop-under) leihoak zure nabigatze esperientziatik, behin eta betirako. Pop-up leihoak blokeatu nahi ez dizkiezun guneen zerrenda mantendu dezakezu baita.

Eguneraketa automatikoa

Kode irekiko estrategiak segurtasun arazoak inoiz baino lehenago aurkitu eta konpontzea ahalbidetzen digu, Firefox nabigatzeko modurik seguruena bihurtuz. Eguneraketak instalatzeko ohar automatikoak jasoko dituzu, momentuan instalatzeko edo prest zaudenean egiteko.

Memoriaren erabilera txikiagoa

Berbarik onena, laburrena: Firefoxek lan egiteko zure ordenagailuari inoiz baino memoria gutxiago eskatzen dio.

Memoriaren kudeaketa

Kudeaketa funtzio berri guztiak martxan daudela, Firefox 3k memoriaren erabilpena kontrolpean dauka. XPCOM ziklo biltzailea erabili gabeko memoria etengabe askatzen dabil. Bestetik, ehundaka memoria jario orain kontrolpean daude.

Orrien karga bizkorragoa

Orrien prozesatze-motorra birdiseinatu da web orriak oraindik arinago kargatu daitezen—eta behar bezala bistaratu.

Kolore profila

Zure sareko argazki-albumetako koloreak distiratsuago ikusiko dituzu orain, motor grafikoari egin dizkiogun hobekuntzei esker.

Gehigarri kudeatzailea

Bilatu eta instalatu gehigarriak zuzenean zure nabigatzailetik. Ez dugu berriz gehigarrien webgunea bisitatu beharko—soilik abiarazi gehigarri kudeatzailea. Ez dakizula zein den zuretzat gehigarririk egokiena? Sailkapenek, gomendioek, deskribapenek eta gehigarrien irudiek aukeraketa egokia egiten lagunduko dizute. Guztiz integratutako gehigarri kudeatzaileak beste batzuek garatutako gehigarriak ere ikusi, kudeatu eta ezgaitzea baimentzen digu.

Gehigarrietatik haratago

Gehigarriak pertsonalizazioaren muina izanda ere, Firefoxen egokitzapena ez da hor gelditzen. Bilaketa-motorrak gehitu, barren hobespenak aldatu, nabigazio botoien itxura, tamaina eta formak aldatu ... hobespen osagarriekin, Gmail bezalako web posta bezeroa lehenetsi dezakezu posta helbide batean klik egitean mezu berria prestatzeko edo gustukoak dituzun blogen berriak lehenetsitako aplikazioan ireki ahal izateko.

Jantzi Firefox Personasekin

Gure gaiak hobetu ditugu nabigatzailearentzako milaka gai arin erabiltzeko aukera izan dezazun, Firefoxen itxura aldatu dezakezularik klik bakarrarekin. Diseinurik soilenetatik marrazkirik koloretsuenetara, esaterako Harry Potter, Bob Marley edo Lance Armstrongen LiveStrong fundazioaren gaiak.

Etiketak

Etiketatu webguneak zuretzako esanguratsuak diren hitzekin. Esate baterako, www.berria.info guneari "berriak" eta "euskara" etiketak jarri eta www.bbc.co.uk guneari "berriak" etiketa jar diezaiokezu. Helbide-barran "berriak" hitza idaztean bi lekuak agertuko dira aukera moduan. Gune bakar batek hainbat etiketa izan ditzake eta ez dago inolako mugarik sortutako etiketa kopuruan. Batzutan orri baten izena ez dugu gogoratzen, baina esanahi logikoa duten etiketak erabilita erraz aurkituko dugu.

Biltegia

Nabigazio ahalik eta eraginkorragoa izan. Historia (bisitatutako webgune guztiak) eta laster-markak (gordetako webgune guztiak) biltegian gordetzen dira. Modu honetan erraz antolatu eta bilatu daitezke. Maiz egindako bilaketak karpeta dinamiko azkarretan gorde daitezke. Karpeta hauek laster-markak eta historia hazten den heinean eguneratzen dira.

Ortografia zuzentzailea

Integratutako ortografia zuzentzaileak edozein web orritan (blogetan idaztean, web posta mezuak idaztean, ...) testuak idaztea errazten digu, ortografia akatsak eta hiztripuak ahaztuz. Egin lan zuzenean web bitartez eta erraztu zure bizitza.

Saioa berreskuratzea

Berrabiarazi nabigatzailea zeunden egoera mantenduz gehigarri edo eguneraketa bat instalatu ondoren. Eta Firefox bapatean eta nahi gabe ixten denean, ez duzu zertan irekita zeuden leihoak berreskuratzen denbora galdu behar. Posta elektroniko mezu bat idazten ari bazinen ere, idatzitako azken hitza berreskuratuko duzu. Saioaren berreskuratzearekin irekitako leiho eta fitxak berriz zabaltzen dira, idatzitako testua eta martxan zeuden deskargak berreskuratuz.

Erabateko zooma

Gogokoen duzun berrien orria bisitatzean, argazkiaren azpian dagoen letra txikia edo argazkia bera nahiago duzun tamainan ikus dezakezu. Zoom berriaren ezaugarri dotore honekin orri osoa handitu dezakezu. Espero duzun moduan eskalatuko da orria, osatzen duten elementu guztiak modu berean tamainaz aldatuta.

Antolaketa erraza

Ordenatu zure guneak. Aldatu zure fitxen ordena saguarekin arrastatuz, mugimendu soil batez. Edo, nabigatzailearen leihoa fitxa larregirekin betetzen badabil, arrastatu fitxa bat kanpora eta leiho berri batean irekiko da.

Berrireki itxitako fitxak eta leihoak

Nahi gabe fitxa edo leiho bat ixten baduzu, klik bakarrarekin berrireki dezakezu. Ikusi 'Azkenaldian itxitako fitxak' edo 'Azkenaldian itxitako leihoak' Historia menuan eta hautatu berrireki nahi duzun fitxa edo leihoa.

Gorde eta irten

Firefox ixtean, irekitako fitxak eta leihoak gorde ditzakezu hurrengo aldirako. Ez duzu berriro leihoak zabaltzen ibili beharko saioa hastean.

Scroll atsegina

Gogokoen dituzun 20 orriak aldi berean irekita edukitzea gustuko? Ezaugarri berri eta dotore honek fitxen artean scroll egitea errazten dizu.

Web bilaketa integratua

Webak bilatzea lan erraza da helbide-barraren eskuman dagoen bilaketa-barrarekin. Gogoko duzun bilaketa-motorra erabili eta bilatu nahi duzuna zuzenean kutxan idatzi. Kutxaren zabalera zure beharretara egokitu daiteke.

Ehundaka bilaketa-motor

Bilaketa-barra erabiliz, gogoko dituzun bilaketa-motorrak modu erraz eta arinean kontsultatu. Bilaketa bakoitzeko motor desberdina erabil dezakezu. Lehenetsita dauden motorrak zerrendatik aukeratu edo zerrendatik bertatik "Kudeatu bilaketa-motorrak" aukeratu hauek kudeatzeko. Aukeratu zure gogokoenak.

Irisgarritasunaren alde

Sakatu beharreko teklak gero eta gutxiago dira, web orrietan zoomak baimentzen ditu, gero eta pantaila-irakurle gehiago onartzen ditu,... Firefox ezinduentzako askoz erabilterrazagoa da.

Pertsonalizazio unibertsala

Itzulpenetik haratago joan eta benetan zuretzako zentzua duen webaz gozatu. Munduko toki bakoitzeko garatzaileak lekuan lekuko Firefoxen bertsioa pertsonalizatu dute tokiko hiztegiekin, bilaketa-motorrekin, laster-marka dinamikoekin eta web jarioekin. Bizi zaren lekuaren arabera, Berria.info-ko titularrak ikusi ahal izango dituzu edo Txinan kokatutako Baidu bilatzailean bilaketak egiteko aukera izango duzu.

Firefoxen hizkuntza

Firefoxek beste edozein nabigatzailek ez bezala hitz egiten du euskaraz. Weba mundu osoan zehar hedatzen den baliabide bat da eta pertsona guztiona da. Horregatik ahalik eta hizkuntza gehien hitz egiten du Firefoxek. 74 hizkuntzatara dago itzulita, frantses edo txineratik, finlandiera edo txekierararte. Bilatu zure hizkuntza (Hizkuntza guztien zerrenda AEBetarako webgunean).

Offline nabigatzea

Jarri zure konputagailua lineaz kanpo, baina informazioa hatz puntetan izaten jarraituz. Zenbait webgunek aplikazioei—adibidez zure web posta zerbitzuari—zurekin egoten utziko die uneoro.

Kokapenaren araberako nabigazioa

Orain Firefoxek webguneei zure kokapena jakinarazi ahalko die inguruko informazio zentzuzkoa eta erabilgarria eskura dezazun (adibidez, zure inguruko jatetxeen helbideak). Dena da hautazkoa - Firefoxek ez du zure informaziorik partekatzen zure baimenik gabe - eta zure pribatutasuna babestuz egiten da.

Hurrengo belaunaldiko grafikoak

Sinesteko ikusi egin behar. Testu eta grafikoen prozesatzea, SVG eta Canvas barne, inoiz baino bizkorragoa eta zorrotzagoa da, gure motor grafiko hobetuari esker. Firefoxek automatikoki zuzentzen ditu irudien koloreak, kolore profilaren informazioa euren baitan badute (adibidez, argazki digitaletan). Honela koloreak behar bezala bistaratzen dira.

Bideo eta audio irekia

Sareko mediaren etorkizuna dakarkizugu! Firefox da bideo eta audio formatu irekiak jasaten dituen aurreneko nabigatzailea, webguneei eduki aberatsa bistaratzeko muga gabeko aukerak eskainiz. Formatu irekiek webgune modernoei media bistaratzeko bidea ematen diete plugin-ik edo software pribatiborik deskargatu gabe.

Zuzeneko laguntza

Firefoxen adituak diren lagun ugari dugu zure galderen zain, zalantza batzuk argitzeko benetako pertsona batekin elkarrizketa erreal bat beharrezkoa delako. Orain hitz egin dezakezu Firefox komunitateko kideekin, zure arazoak zuzeneko txat baten bitartez konpontzeko. Ez duzu itxaron beharrik izango.

Firefoxen laguntza

Laguntza espero zenuen lekuan dago, eta baita beste zenbait tokitan ere. Nabigatzailearen goikaldeko lotura batek laguntza gunera eramango zaitu, behar dituzun erantzunetara. Zalantza sakonagoak dituzu—edo galdera oso zail bat?

Firefoxen laguntza webgunean jakintza-basean artikuluen bilaketak egin ahalko dituzu, eta baita konponbidez betetako foro eta tutorialak, eta esperientzia hobe baterako aholkuak ere.